Eph 2 | ASO | STEP | Ido' lingine Zuda ve minamavesi gomu' monovo goloso palasa di soto' igi ido' lihimetinesi ve minaa' adi'mo lutine nene mo hele vine' gelavo minanguti' nene O'moso'mo Kilisito'ni hilinguti' do ote-dingu' nene linginesi makato' do ote-lingidine' ve.

Ephesians 2

Laza Nene Helaa' Akalo' Mine Molo Minuninguti' O'moso'mo Do Lu' Izine' Nemu' Paulo' Lo-ngimine'

1 Ido' lingine Zuda ve minamavesi gomu' monovo goloso palasa di soto' igi ido' lihimetinesi ve minaa' adi'mo lutine nene mo hele vine' gelavo minanguti' nene O'moso'mo Kilisito'ni hilinguti' do ote-dingu' nene linginesi makato' do ote-lingidine' ve. 2 Ee, gomu' nene lingine me misubou' aleveti monovo golosolo' e'meti nivi sikalahu' golosoliti muliselo' gizebo o neive eito' gelekele' igi minani' gameneu' nene monovo goloso palasa di soto' igi lihime di'mi vi minaa' ani' ve. Ido' a'mine sikalahu' golosoliti guve'inesi ve nene O'moso'mi gamazi gili hulaa' naveti lu'ningu' idise gono do minaa' ive nene neive. 3 Ido' gomu' nene Zuda ve lazasi nene a'mine O'moso'mi gamazi gili hulaa' avete igi mili iga' adi'mine ogo laza muki' gomu' lemeni dameni goloso ne'mo umo hilido' e'meto okodesi ido' gatesi engi' lasido' ogo molo minaa' une' ve. Ido' evene' linge muki' minani' ne'mino lazasi nene O'moso'mo izebolo' molavo lebelelido' o minine' lemeni dameni golososi minune' ve. 4 Ne'mino mino laza nene goloso initete ne'mo lutesi mo hele vivo minune' gelavo minune'za O'moso'mo leli' mulumote gelo isete vauve elo izaa' ive minosa lulo atoli'mine ogo lemaa' neine' nenako nemu' nene Kilisito'ni aza hilinguti' do ote-dingu' nene goloso initete ne'mo lelikisi hilune' gelavo noninguti' nene makato' do ote-lidine' ve. Ido' Kilisito'ni nene Okulumokuko do dize-do evene' nabalitevo' minaa' ani' mo'mosito' ele'mize molangu' nene lelikisi a'mine'mine ogo do dize-ledo a'mine ne'mine mo'mositelo' lele'mize molani' gelave. O'moso'mo ne'mino do lu' izine' nene inite' mamukisi nomine' asi mo leli' do lamine' o-ledelove losa do lu' izine' ve. 7 Aza ne'mino do lu' izine' nene evene' alinge' gamenela vomine atoli'mine ogo aza leli' do lamine' o-lidine' nene ningilizave losa ngelebizelesa ne'mino do lu' izine' ve. Ido' ne'mine ogo do lu' izelesa Izesu' Kilisito'ni nene lelikumu' ogo helelive lo imiseline' ne'mo nene lelikumu' do atoli'mine ogo muhelete ningine' nene soto' ogo neive. 8 Ee, O'moso'mo do lu' izine' nene inite' mamukisi nomine' asi mo leli' do lamine' o-ledelove losa nasahili' o-ledavo Izesu'nimu' gele ele'vole' une' nemu' nene do lu' izine' ve. Laza leli' amuzoteloti' gono duningumu' do lu' izamive. Asi O'moso'mo haza gidini ne'mine o-lidine' ve. 9 Ido' laza nene gono do minuningumu' do lu' izine' nomine' nenako nemu' nene leli' gono do minunidoti' ve lo okode do naba oga' nene ma nomive. 10 Ido' ne'mine noluvoni' nene O'moso'mo asi've gono dosa leli' do soto' o-ledavo none' nenako nemu' noluve. Aza nene leli' olihe do soto' o-ledamosa leli' nene monovo laminetokovo' e'meti minilizave losa gomukuti' gele minine' nenako laza Izesu' Kilisitoda gi'mizekunivo nemu' nene aza a'mine monovo lamine' nene igi mili minilizangumu' ve lo lemeni dameni gosoho' do soto' o-lidine' ve.

Gomu' Laza Nene Zuda Ve Minunivo Lingine Heta Ato' Ve Minavo Minunidoti' Nene O'moso'mo Kilisito' Evenele Lolo' O-ledo Do Hamo' O-ledave Lo Paulo' Lo-ngimine'

11 Ido' lingine goloso gehepeve igi minanguti' nene O'moso'mo ne'mine ogo do lungu' izine' nenako nemu' gatine molavo opo'ni lami minikelizave. Nemu' nene O'moso'mi noso nene lengi' okodido' minamivo lingine heta ato' ve ve li li-lingidaa' ani' nemu' nene gatine molamivo ha gili minilo. Ee, evene' ingine a'inedunu' oko'ine lolovo huki hulaa' ani' nenako a'minemu' nene O'moso'mi noso do nonive ma nene none li laa' ave Zuda Ve ingine nene lengikumu' O'moso'mi noso di minamave ve li li-lingidaa' ani' ve. 12 A'mine gamenelo' nene lingine O'moso'mi evenele zuho Isilaele' aleveuti' minami heta ato' ve mini O'moso'mo Isilaele' aleve do ngu' izelive ma engita imiselelesa lo huko-ngidine' gamazi'mi lulou' nene lingine minami ido' Kilisitokisi nene do lungu' ezelido' mini mili minamani' gelavo ido' O'mososi nene lengikisi minamine' gelavo ido' inite' lamine' soto' o-ledeleseive li lingine gili ele'vole' igi a'minemu' gizebo igi minilizani' inite' nesi nene ma minamivo lingine misubouko haza minivi divi' igi mini mudise goloso ilizani' akalo' mini mili minani' nene gatine molamivo ha gili minilo. 13 Ee, ne'mine igi minani'za lingine gomu' nene O'mosomu' ningi gilami abaza' minave ma nene idise mo Kilisitoda igi gi'mizikevo lihimetinemu' vanise've hulo hiline' ne'mo nene lengele'mize O'mosola ogavo nizave. 14 Ido' ne'mine noluvoni' nene Kilisito' aza asi've nene heta ato' vesi Zuda vesi nene do hongu lo-ledo do hamo' o-lidine' nenako laza zou lo minune' monovo nene eitati' nenako nemu' nene noluve. Aza nene ge lukehe nebele ne lukehe gebele lo minune' monovote nene laza Zuda vesi heta ato' vesi minuningu' oluso' nene gesi ne'mine minine' nene kelo lolotolo' ogo do hulo lele'mize hamo' ine' ve. 15 Ido' Mose' aza ne'mine mana'mine ilo lo lou' gamazi ato ato' Zuda vemu' lo huko-ledavo ne'mi gesi mingu' minunivo ne'mo Zuda vesi heta ato' vesi do ato ato' o-ledavo ge lukehe nebele ne lukehe gebele lo minunivo Kilisito' aza Zuda vesi heta ato' vesi ato ato' minuninguti' nene do hamo' o-ledo a'mine zuho sita' minuninguti' nene hamo' zuho ne'mine gosoho' lolo' o-ngedelove lo ei' oko'no hulo hilidi'mo a'mine lou' gamazi nene do hulo do hongu lo-lidine' ve. 16 Izesu' aza nene lohoto' zalo' hilidi'mo laza Zuda ve minunivesi heta ato' vesi nene hoto hoto' mino lovo lolize une' giline' nene do hele-ledo mulise hamo' lolo' o-ledo ido' O'moso aza lihimetemu' izebolo' molavo minine' nesi nene bele helo O'mosola makato' do bize-ledo zogo limine' ve. 17 Ne'mine ogo hongu lo laminoovo' minali'mi gamazi nene O'mosomu' gilami abaza' minave heta ve linginesi ido' abaza' minamo O'mososi bizo minunive Zuda ve lelikisi nene ogo lo soto' ogo lo-lemavo gelekune. 18 Ne'mine noluvoni' nene KIlisito' aza lihimetemu' helo heta ato' vesi ido' Zuda vesi sitato' O'moso metehida alone' akate vele-ledavo O'moso'mi Sikalahu' hamo' ne'mo lele'mizo a'mine akalo' ogavo laza sitato' a'mido' ha oga' noune' nenako nemu' noluve.

19 Nemu' nene heta ato' ve lingine gomu' nene venenga ve ne'mine ido' ga' ve ne'mine minani' nene gohi minami O'moso'mi evene'vela vi gi'mizi eze gizebo ingu' minuniveti zuhou' nene mudise vi gi'mizi minikeve. 20 Ne'mine igi mini ei' evenele lili' igi minikevo O'moso aza lengiku' minevo' alevo' ogo minine' ne'mo lingine nene ei' numu've ne'mine lili' igi nizave. Ido' laza aposolokisi polohetesi nene mono' numuno di oti gizaa' nani' simeni ne'mine nene nonivo numuno nene lelito' do ngi lo lehete o minaa' neive. Ido' Kilisito' neve nene numuno muki' do gili' lo do ngi lo do minaa' ive numuno langise ne'mine nene mino numuno muki' nene do ngi lo neive. 21 Ee, numunoli'mi oko'no vai' nene ezelo' lehete o neivo ne'mo nene Guvelesi ve'mi kekeize mono' numuno lolo' o'mo vo minaa' neive. 22 Ido' linginesi Guvelesi vela igi gi'mizani' ne'mo O'moso aza a'mingu' minevo dovo' ilive lo O'moso'mi Sikalahu' ne'mo linginesi nene a'mine numuno ne'mi lingelalati' nene lolo' o-lengede'mo novive.